Pensieri luntani

Quandu cala llu sule tutte e sire
me sientu nu mindicu disperatu
Allu Migliusu mi nde vorra jire
allu paise ch'aju abbandunatu
E pienzu a cchille case e a chilla gente
tanti ricuordi tornanu alla mente

Quantu dulure ancora sientu mpiettu
viju a za Marastella allu quaziettu
Nu mundu duve u primu era llu pane
duve alla scola jiemu ccu lle zane
Viju alla chjazza na fhinestra chjusa
duve Rosa affacciava ccu nna scusa

Me ngrizzulanu i carni arrassu sia
si giru a capu e guardu a casa mia
Si vaju ancore versu a vallarella
me pare ancore ca' sta vita e` bella
Palate e mamma chi parienu rose
gente chi fha sempre e stesse cose

E casicelle alla rasa d'a strata
ancuna nova e ancuna scatrejata
E fhuntane d'a' vecchja u cumune e collaru
cuculu , zingaru i granci e ruvettaru
L'erva e lli juri ppe l'ascenzione
e doppu tutti quanti n'prucessione

Hoi vecchja chjazza un'e` cangiatu nente
alli scaluni sempre a stessa gente
U pratanu e' crisciutu e l'umbra duna
puru quandu e' dde sira sutta a luna
Nu viecchju parra ancora d'o passatu
quandu a sira tornava assulicchjato

Mo me fhiermu e cce pienzu n'atra vota
a capu gira e va' cumu na rota
A sira e tarda ed io sugnu luntanu
runziju e giru cumu a nnu tavanu
Ma sina chi un me mintenu ntra' fhossa
viegnu e ve' stringiu ancora ssi quattrossa

Il rapporto con la propria terra e’ un sentimento cosi’ forte e profondo che solo la poesia puo’ tradurlo in parole ed immagini scandendolo in versi armonici e sentimenti che non non finiscono mai di provocare emozioni incisive e forti alla sola rievocazione

Pino Della Porta